Isa sa hindi matapos tapos na issue ng ating bansa ay ang JUETENG. Hindi pa yata ako pinapanganak mayron ng jueteng sa bansa. Natatandaan ko pa nooon nung minsan akong tumaya, nanalo ako tuwang tuwa ako noon kasi unang beses ko pa lang naranasan na manalo sa ganong klase ng palaro. Ang jueteng ay parang lotto din kung tutuusin subalit dalawang numero lang ang pwede mong piliin. Hindi naman ganun kalakihan ang taya depende kung magkano ang gusto mo.
Ang hindi ko lang lubos maisip ay kung bakit hindi nila maisakatuparan na gawing legal ang jueteng? O hindi man lang nila magawan ng paraan na mawala ang ganitong klase ng sugal. Hindi kaya dahil sa dami ng mga matataas na pulitikong humahawak dito?
Isa ang jueteng sa dahilan ng pagkakatalsik ng dating pangulong Joseph Ejercito Estrada na sinasabing siya ang utak ng jueteng sa bansa. Ngunit, bakit ng natanggal siya sa kanyang panunungkulan ay narito pa rin at buhay na buhay ang operasyon ng jueteng sa bansa?
Kamakailan lamang ay lumutang ang balitang mayron daw dalawang matataas na posisyon sa Palasyo ang tumatanggap ng malaking halaga galing sa jueteng. Ito ay binanggit ng retiradong Arsobispo na si Oscar Cruz (Head at Co-Founder ng Krusadang Bayan Laban sa Jueteng (People’s Crusade Against Jueteng). Isiniwalat niya na ang dalawang taong tumatanggap daw ng pera galing sa jueteng ay sina Department of Interior and Local Government (DILG) Undersecretary Rico Puno at ang retiradong si Philippine National Police (PNP) chief Director General Jesus Verzosa.
Ang Senadora namang si Miriam Defensor Santiago ay nagsiwalat din ng lahat ng pangalan ng mga pulitikong tumatanggap ng malalaking halaga.
Sinong mag aakala na kung sino pa ang may pinaka-mataas na tungkulin sa gobyerno ay sila pa itong gumagawa ng kalokohan? Hindi na rin nakakapagtaka na marami sa atin ang gustong makapasok sa pulitika. Kung tutuusin gasino lang ang sweldo ng mga pulitkong ito. Ngunit bakit marami pa rin ang gustong makapasok? Dahil nga ba sa gusto nilang makatulong sa bansa? O gusto nilang tulungan sila ng bansa?
Isa lang ang naiisip kong solution sa problemang ito. Gawing legal ang larong jueteng upang ang makinabang ay ang mga taong bayan("sana") at hindi kubrahin ng mga ilang tiwaling pulitiko. Hindi naman dahil sa nanalo ako dati, ito ay isa lang mungkahi ng isang mamayang umaasa na may pagbabago pa.